踏話頭　挩窗去弄險

序　　開窗冒險去

?

第一集　　　蠟條

第二集　　　加薦

第三集　　　尾溜

第四集　　　打貓

第五集　　　茶鈷

第六集　　　珍珠

第七集　　　雲尪

第八集　　　掛號

第九集　　　紅線

第十集　　　放送

第十一集　　柳枝

第十二集　　出磺

第十三集　　批信

第十四集　　骷髏

第十五集　　魯蛇

第十六集　　炸彈

第十七集　　地陷

第十八集　　Phe-Tshia

第十九集　　水燈

第二十集　　鴨仔

第二十一集　鬼厝

第二十二集　溪底

第二十三集　金光

第二十四集　欶管

第二十五集　捙拚

第二十六集　昏迷

第二十七集　飛天

第二十八集　地獄

第二十九集　臨界

第三十集　　日誌

踏話頭　



挩窗去弄險

　　

　　2012年的熱天，彼時阮查某囝猶細漢，暗時電火關起來欲睏進前，若無講故事予過癮，是絕對袂放我煞的。

　　按呢逐工講逐工講，我烏白編亂亂說強欲無膏矣，囡仔硬愛我講落去，而且閣出難題：阮欲聽獅仔的故事啦！



　　嘛毋知欲講啥，我就講有一隻獅仔，廟門祀的彼款石獅仔，伊尻川癢，癢幾若十冬矣。



　　話頭遮爾仔趣味，查某囝精神就來矣，要求我共故事講透流。進前全無本，時到時擔當，紲落來我就講這隻石獅仔迒過神人的隔界，趁廟口無人，央一?囝仔兄來共爬癢，解決伊的舊症頭。（註1）



　　囡仔兄就是這本冊的主角：挩窗（Thuah-thang），佇彼?暗暝顯聖，行來我佮查某囝的地頭。毋管是食飯、睏進前、或者坐車無聊時，見若有要求，我就來講古，講挩窗佇人世和神明界飛天鑽地，走跳台灣南北二路，行踏世界各國，這?囡仔兄??領阮規家伙仔?入去奇幻的宇宙，可比拍電動解破一關閣一關，精彩刺激，鬧熱趣味。故事有長有短，有零星有規部的，抾拾整理好勢，用台文落筆，這就是「挩窗去弄險」系列。



　　Thuah-thang，四常的意思是人目睭仁對袂正，雞仔目，袂輸共人譬相；佇我的故事內底，「挩窗--e」是一?勇敢掛智慧的小英雄；毋閣，若按日常的口語寫做台文，踮文學藝術的境界，「挩窗」的意義是：共心肝頭的窗仔門挩開，來去看這?美麗新世界。



　　2014年11月初，毋知是啥因端，雄雄想欲去騎虎王爺遐拜拜。踏踮廟埕，囡仔時來這搭圍仔補作文、食筒仔米糕的記持就瀳倚來矣。1984年騎虎王爺廟過翻起新廟，舊料保存落來，有影頂真，上寶貴的是柴雕的鰲魚，幼路閣活氣。較拍損的是，檢采為著保護驚去傷著，煞關佇咧鐵窗仔內。



　　我隨咒誓，定著來寫故事，共鰲魚救出來。（註2）



　　按怎救呢？自細漢蹛民雄街仔附近，規年迵天上重要的鬧熱，就是下街（?-ke）。彼是民雄囡仔最大的向望，我就共踅下街鬥鬧熱的歡喜和在地的歷史敆做伙，連紲三工佇飯桌仔全台語講古予查某囝聽，紲來用華語拍粗稿，先囥咧。



　　等我台文寫甲較扭掠矣，網路的發表平台嘛有新進展，就主動共SOS reader 提案，感謝團隊的牽成，2016年12月起鼓網路連載，一禮拜刊一集，攏總三十集，有台語文、相片影片、超連結解說佮錄音唸讀，這就是網路版的《大士爺厚火氣》。

這馬，交踮你手頭的，是紙印的《大士爺厚火氣》，多謝前衛出版社和主編鄭清鴻綿爛編輯，國藝會和火金姑台語文學基金補助，洪福田的版畫藝術，排版束結，朗讀錄音紲拍好聽，予這部出版計畫毋但完成，閣予台文冊一坎起去，實在是豐沛、?氣、奅啦！



　　順聰我骨力拍拚創作《大士爺厚火氣》，是欲來建立「現代台文」敘述SOP，予台語飽滇的力頭盡展；而且用輕鬆活跳的小說，??讀者來認捌台灣的神明鬼怪、歷史地理、傳說故事；上要緊的是，思考現代文明的困境佮未來。



　　故事全我編的，純屬虛構，若有雷同，彼攏是?拄?。內容對神明不敬的所在，請多多包涵，順聰我做的一切，攏是為著推?台語，共咱的文化底蒂和宗教精神發揚光大。



　　當咧寫故事之時，九十幾歲的阿媽忽然間倒勼，轉去做一?囡仔，講話離離落落，頭殼沓沓仔失去……我看著真毋甘，就去握伊的手……經歷人生滄桑坎坷，阿媽的手面親像囡仔遐爾仔金滑幼秀……講著下街，阿媽煞記甲真清楚，講往過??我去看大士爺伯化火的記持，宛然拄去過彼款……。



　　細漢時上愛轉去阿媽的田庄遐耍，佇古厝的眠床頂，聽阿媽講???????（桃太郎）物語，我講古的才調是伊傳予我的。阿媽的台語講甲遐爾仔老（lau），我是一?冊讀甲真懸的智識分子，閣是?筆的作家，怎會當輸予共我惜命命的阿媽呢！



　　「挩窗去弄險」系列故事，毋但講予我的查某囝聽，是欲予全台灣的囡仔聽，千千萬萬的囡仔聽，大人嘛愛斟酌聽─恁會當佇故事內底使囡仔性，佮「挩窗」仝款，四界行踏，認捌這?心適到有賰的美麗世界，啥物攏毋驚。



　　準備好矣未？和我同齊大聲喝出來：



　　我是勇敢掛智慧的小英雄，這場人生的大弄險，來起行！



　　註1：完整故事刊印佇《牧笛獎精品童話11：蒼蠅螞蟻讀心術》，鄭順聰〈屁股癢的石獅子〉彼篇，國語日報出版。

　　註2：我寫的是彼時的情形。後來，廟方共鐵窗仔換做新櫥仔，做甲真好勢，鰲魚這馬蹛佇咧真四序的所在呢。

?