香港二樓書店 > 都柏林人（台文版）

譯序（節錄）

《都柏林人》：寫人，嘛是寫城市

劉盈成

　　《都柏林人》（1914）是詹斯．若依斯e頭一部重要作品，提都柏林人e市民做主角，寫做十五篇e短篇小說。都柏林是愛呂蘭e首都，大英帝國e一座大城市，嘛是若依斯e故鄉。十五篇敆做一?整體，表面是咧寫人，寫一寡中產階級市民，事實是藉市民來描寫城市，欲呈現這?城市（佮愛呂蘭）e精神麻痺。自按呢，若依斯開示一條「城市解剖」e路數，都柏林去予文學家頭一斗提伊「城市」e身份來做題材。

　　這?路數，台灣e文學讀者拍算有熟似。《都柏林人》佮台灣文學（無論是華文或者台文）e牽連，咱直接會聯想去白先勇（Pe?h Sian-iong）e《台北人》（1971）。頭一項，這本號冊名就佮1914年e《都柏林人》仝一?手法。限定一?城市，用幾若篇e短篇小說，描繪（biau-hu?）城裡五花十色e人。若依斯十五篇，白先勇十四篇，兩爿攏是敆做一?整體，解剖城市e心靈。寫人，嘛是寫城市。

　　都柏林這?城市毋但是誠實有，小說內底市民生活e所在，包括街仔路、酒館、小店、建築物、冊店、地號名，猶閣有歷史人物e遺事，攏是誠實--e。H?m「英國殖民」佮「天主教」兩大勢力，嘛正經佇本城咧走跳。所致，小說虛構（hikoo）e都柏林人，舉動言語攏有伊「寫實」e環境。若依斯用這號筆路，忠實打造都柏林人無風無搖e生活，佮無味無素e故事情節。

　　這寡都柏林人，主要是無「存在感」e市民，nobody（若是《台北人》，有頭面e人物就較濟）。??e人生故事，無啥物精彩e情節，毋是奇巧刺激、予人讚嘆（tsan-than）彼路。啊若依斯這部現代性格e城市文學，干干仔就利用平凡小市民e故事，來刺（tshiah）這?城市e根底。

　　《都柏林人》e市民毋但有大人，嘛有囡仔、少年人，正經是「大人囡仔攏來看」。猶未成年--e，有e囡仔較巧，佮神父學智識，有e人偷走學，有--e數想初戀。大漢了後，有人正正當當上班食頭路，有人浮浪貢，有人按算欲交陪好額人，通做伙趁大錢。正經度日--e，有人佇大學教冊或者私人教師，有人做辛勞，有人四界走傱賣貨，有人是厝稅予人蹛。宗教方面講著神父，有--e中風，有--e愛讀一寡世俗、刺激e冒險小說，也有愛聽人偷來暗去e情愛故事，也有人犯錯誤，袂當閣再主持彌撒、聽人告解。

　　有人踏入婚姻罔度日，有人欲佮情郎相??走、煞臨時叫毋敢，也有人孤身一?無想欲嫁娶。無情e人放捨情愛，有情人心懷欲望；欲望若無滿足，有人拍囡仔拄數，有人用文學詩歌來消磨人生，有人艱苦甲去予火車?死。有人酒?甲茫茫，有人醉甲跋落樓梯跤，有人??一下就好。有做老母--e欲栽培查某囝踏入較好e社會，嘛有老母利用查某囝e青春，做套欲揣一?囝婿。有人認同愛呂蘭e文化佮獨立地位，有人接受殖民統治，凊彩會得過就好。

　　這都描寫浮世眾生啊，二十一世紀e讀者凡勢看著誠慣勢矣。毋過越轉去百外冬前，天主教信仰、英國殖民攏是理所當然e價值，這是都柏林e「A面」。啊經過這十五篇故事，經過無風無搖e生活描寫，市民e心靈麻痺才來拆破。都柏林e「B面」，自按呢就予若依斯共反（ping）出來。

　　（略）

　　用台語來翻譯世界文學經典，毋是干焦為著台語真親切、有鄉土味，予咱想起阿公阿媽，嘛毋是干焦欲宣傳台語有偌?。台文譯本毋是綴佇華譯本後尾、罔加一種語言e譯本，嘛毋是欲喝一句「《都柏林人》也會曉講台語喔」爾。正經講，世界各地文學、語言e現代化，定著需要外國文學經典e翻譯佮紹介。日本、華語e文學，攏捌行過仝一條路，台語e現代化嘛著愛。

　　欲翻譯外國e文學經典，有人嫌台語無彼號資格。我想著囡仔時代，老母捌提海明威《戰地春夢》e華譯本，改用台語講予我聽。彼當陣阮英文袂曉，毋過，無仝語言有通互相來理解、轉述，這阮自來毋捌懷疑。